GOVERNMENT OF TONGA

MEDIA RELEASE

(‘Aho 27 ‘o ‘Aokosi, 2015)

“Fakaola ‘e he ‘Ene ‘Afió ko e Tu’i ko Tupou VI ‘a e Makatu’unga ‘o e Polokalama Fakalakalaka  ke  Langa ‘a e  Fale  Fakapule’anga  ne fakakoloa ‘e he ‘Ene ‘Afió Kingi Siaosi Tupou V ko e  St.  George  Palace ‘i Pangai Si’i  ‘i he  Tūsite,  ‘aho  25  ‘o  ‘Ākosi  2015 he  2.00  p.m.”

 

Na’e fakaola ‘e he ‘Ene ‘Afió ko e Tu’i ko Tupou VI ‘a e makatu’unga ‘o e Polokalama Fakalakalaka koia ke langa ‘a e Fale Fakapule’anga ‘aia ne fakakoloa  ‘e he La’ā Kuo Unga Fonuá, Kingi Siaosi Tupou V ko e St. George Palace ‘i  Pangai Si’í ‘i he  2.00 p.m. ‘o e Tūsite,  ‘aho 25 ‘o ‘Ākosi 2015.

Na’e me’a ‘i he Ouau Mahu’ingá ni ‘a e Ta’ahine Pilinisesi Kalauní Sinaitakala, kae’uma’ā ‘a e ni’ihi ‘o e Hou’eiki Nōpele ‘a ‘Ene ‘Afió, Kau Minisitā ‘o e Kapinetí mo e Kau Fakafofonga Fale Aleá, Kau ‘Amipasitoa, Talafekau Lahi e Konisela Fakalāngilangí, Fakamaau Lahí, Kau Taki ‘o e Ngaahi Potungāué, Pisinisi Fakapule’angá, Sekitoa Taautahá, Sosaieti Sivilé, Kau Pule Fakavahé mo e ni’ihi e Kakai ‘o e Fonuá.

Ko e Lotu Fakafeta’i mo Fakatāpui ‘o e Makatu’ungá na’e fakahoko ia ‘e he Faifekau Faka-Tu’í mo e Palesiteni ‘o e Siasi Uesiliana Tau’atāina ‘o Tongá, Faifekau Toketā ‘Ahio.

Fakatatau ki he Me’a Talitali ‘a e Palēmiá, Hon. Samuela ‘Akilisi Pōhivá :-

“I he faka’osinga ‘o e  2010 na’e hangē ha taulua ‘aha folau tongiakí ‘a e  ngaholo ‘a e  Kalia ‘o e Polokalama Fakalelei ki he Konisitūtoné  mo e Fili Fale  Aleá ‘o ‘aloua pea mo hono tohi mo ha’alo ‘a e fe’unu ki hono lālanga mo e  hala fakama’u fatu ‘o e Polokalama  Fakalakalaka ke langa ‘a e [‘Ōfisi  Fakapule’angá ni].  ”

Ko e Langi Mama’o ‘a Kingi  Siaosi Tupou Nimá ke ‘i ai ha Fale Lahi Faka pule’anga pē ‘e taha ‘i he uhouhonga ‘o e loto koló ‘aia ‘e lava  ke  fakatahataha’i  ki ai  ha  ni’ihi ‘o e ngaahi tefito’i Potungāue ‘a e Pule’angá  mo e Ngaahi Loki  Fakataha  ke  fakafaingamālie ‘a e fengāue’aki ‘a e ngaahi kupu fekau’aki ‘i he Pule’angá  pea mo e ngaahi  kupu ‘oku ‘ikai ke ‘i he malumalu ‘o e Pule’angá  ka ko e me’a tēpū ke tākanga ‘enau ngaahi fohé ke fakaai mo fakaa’u ‘a e ngaahi  kaveinga ‘oku tulitulifua ki ai ‘a e  kakai ‘o e fonuá pea fetaiaki mo e ngaahi  Taumu’a Ola ‘aia kuo ‘osi fofola – e – fala kae alea’i ‘e he kāinga ‘oku  nau  fatu  ‘a e Palani Langa Fakalakalaka Fakafonua ‘a Tongá.

‘Oku malava ke fakahoko ‘a e Polokalama Langa ko ení ‘i he  Polokalama Tokoni kāfakafa ‘a e Pule’anga ‘o e Lepapulika ‘o e Kakai Siainá. ‘I he me’a ‘a e ‘Amipasitoa Siainá,  H. E. Mr. Huanga Huaguang:-

“ ‘I Tongá ko e fakatupu – pa’anga ‘i he Takimamatá, fakalahi ‘o e   ngaahi Ngāue Langafonua Lalahí, mo hono hiki hake ‘a e ngaahi makatu’unga ‘o e mo’ui ‘a e kakaí, ‘oku mātu’aki fiema’u ke fakalato ia ‘aki ‘a e ivi lahi fakapa’anga mo e kau taukei mo pōto’i  ngāue  tokolahi.  Koia ai ‘e hokohoko atu pē ‘a hono fakatupulekina ‘e he Pule’anga Siainá ‘a e fakalakalaka faka-sōsiale mo faka-’ekonomika ‘a Tongá ‘o fakatatau ki hono ivi mafeiá, pea mo faka’ai’ai ‘a e ngaahi kautaha Siaina tokolahi  ke nau fokotu’u pisinisi mo e ngāue’anga ‘i Tonga ke faka’aonga’i ‘enau pa’angá mo ‘enau ‘ilo mo e pōto’i ngāué ‘i ha ngaahi founga fetokoni’aki ‘aia te na fakatou ma’u mo’ui mei aí. ”

Na’e fakahoko ‘e he Tokoni Palēmiá, Hon. Siaosi Sovaleni ‘a e fatongia ke  fakakakato ‘a e fakahounga’i mo fakamālō’ia ‘o e āfeitaulalo ‘a ‘Ene ‘Afió Kingi Tupou VI ‘o fakakoloa ‘a e Ouau Fakaola ‘a e Makatu’unga ‘o e  Fale Fakapule’anga ko St. George Palace pea mo e tokoni kāfakafa koia ‘a e Pule’anga Siainá kae’uma’ā ‘a e ngaahi  ngāue kotoa pē kuo fakahoko ‘e he kau fakafofonga ‘o e ongo Pule’angá ‘o fakatatau ki he ngaahi tu’utu’uni mo e founga ngāue ki hono fatu, fakava’e, mo vakai’i fakalelei ‘a e fa’unga ngāué ni kae lava ke taufonua ‘a e visone mahu’inga ni ke lavengamālie ai ‘a e kakai ‘o Tongá pea toe longomo’ui mo vāofi ange ai ‘a e vā ngāue mo fetokoni’aki ‘a e Pule’anga Faka-Tu’i ‘o Tongá mo e Lepapulika ‘o e Kakai Siainá.

 

NGATA’ANGA

 

Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax:  (676) 23 888; Ngaahi Faka’eke’eke- Email: pressoffice@pmo.gov.to  

Translate »