GOVERNMENT OF TONGA

MEDIA RELEASE

(‘Aho 18 ‘o ‘Aokosi, 2015)

“Fakapa’anga ‘e he Pule’anga Tongá ‘a e langa fōsoa ‘o Pangai, Ha’apaí.”

 

Na’e tanupou ‘e he Palēmiá, Hon. Samuela ‘Akilisi Pōhiva, ‘a e fōsoa fo’ou ma’a Ha’apai ‘i he ‘aho Tusite 11 ‘o ‘Aokosi ‘i Pangai.

‘Oku fakafuofua ki he TOP$400,000 hono mahu’ingá ‘o fakapa’anga pē ‘e he Pule’anga Tongá. ‘E lele he mita ‘e 200 mei he tafa’aki ki tahi fehangahangai mo e ‘Ofisi Kōvana Ha’apaí ki he Palasi Tau’akipulú. Kuo kamata ‘a e ngāue ki hono faka’ata’atā e konga ko eni ‘e fai ki ai ‘a e ngāué pea ‘oku fakafuofua ki he mita nai ‘e 6 ki tahi.

Ko e fōsoá ni ko e talu eni ‘ene maumau mei he ngaahi matangi talu mei he ta’u 2010 ‘o a’u mai ki he saikolone fakatalopiki ko ‘Ieni ‘i he konga kimu’a ‘o e ta’u kuo ‘osí pea kuo kamata ke ‘auhia e kelekelé he ngāue a e tahí. Ko e ngāué ‘oku fakahoko pē ‘e he Potungāue ki he Ngaahi Ngāue Lalahi ‘a e Pule’angá pea ko Pesalili Tu’iano, ‘Ofisa Pule Ngāue Le’ole’o ‘a e Potungāue ki he Ngaahi Ngaue Lalahi ‘a e ‘enisinia sivile ‘oku ne tokanga’i ‘a e ngāué.

Na’e me’a ‘a e Palēmiá felāve’i mo e liliu ki he fōsoá makatu’unga he feliuliuaki ‘o e ‘eá mo fakahā ko e anga pē ia ‘o natulá, ka na’e tu’unga ia he ko Ha’apai ko e kakai lotolahi mo ivi lahi pea siololoa ki he tūkunga ‘o e mo’uí.

Na’a ne me’a kuo holoa e ivi feinga ‘o e kakai Ha’apaí tupu mei he fakafalala ki he famili ‘i muli pea mole ai ‘a e founga ne teu’i’aki ‘a e kakai e fonuá ke fepaki mo e faliunga ‘o e mo’uí. Na’a ne lave ai ki hono to’o ‘e he ngaahi fakalakalaká hangē ko e telefoni, ‘uhila mo e saliote misini, ‘a e ivi ngāue ‘o e kakaí ka nau fakafalala ki he ngaahi me’angāue ko ení ‘o ‘ikai toe ope atu e fakakaukau he ‘oku ‘ikai ha ngāue ‘e lahi ko e lotó pē mo e poupou ka e lava ha ngaue.

Na’a ne kole ki he kaingá ke nau fetākinima fakataha pea ke tohi tongi ‘a e ‘ofa he fonuá honau lotó pea lau pe me’a kotoa ko ‘enau me’a he neongo ‘etau masivá ka tau fiemālie pē he me’a ‘oku tau ma’ú. Na’a ne kole ki he kainga ke faka’aonga’i honau iví kakato kae fakalakalaka ‘a Ha’apai.

Ko e me’angāué mo e maka ke fakahoko’aki ‘a e langa fōsoá ko e naunau kotoa pē ia ‘a e Potungāue Lalahí pea ‘oku fakafuofua ‘a e ngāué ke kakato ‘i ha mahina ‘e 6-12. Ko e ngāue eni ‘e malava ke ma’u ngāue ai ‘a e kakai ‘o Ha’apaí,

 

Ko e ouau tanupoú na’e tataki ‘e he kau hiva ‘o e Siasi Uesiliana ‘o Pangai/Hihifo pea ko e lotu fakatapui na‘e fakahoko ‘e he Faifekau Sea ‘o e Vahefonua Ha’apai ki he Siasi Uesilianá, Faifekau Toketā Tevita Mohenoa Puloka. Na’e me’a he polokalamá ni mo e ni’ihi ‘o e kau Minisitaá; Kōvana Ha’apaí, Fakafofonga ‘o e Kakai ‘o Ha’apai 12 ki Falealeá mo e kau fakaafe tokolahi.

 

NfIMG_8475

Ko e Palēmia, Hon. Samuela ‘Akilisi Pohiva ‘I hono tanupou ‘o e fōsoa fo’ou ma’a Ha’apaí.

 

 

NGATA’ANGA

 

Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax:  (676) 23 888; Ngaahi Faka’eke’eke- Email: pressoffice@pmo.gov.to  

Translate »