GOVERNMENT OF TONGA

MEDIA RELEASE

(‘Aho 14 ‘Epeleli, 2016)

“ Ko e tu’utu’uni ke fetongi ‘a e Pule Ngāue Le’ole’o (Acting CEO) ki he Potungāue Ako mo e Ako Ngaué ”

Tu’unga ‘i hono fehu’ia mai ‘a e tu’utu’uni ‘a e ‘Eiki Palēmia pea ko e Minisitā ki he Ako mo e Ako Ngāue, Samuela ‘Akilisi Pohiva ke fetongi ‘a e Pule Ngāue Le’ole’o pē Acting CEO ki he Potungāue Ako mo e Ako Ngāue mei a Claude Tupou ki a Ponapate Taunisila ‘o kamata lau mei he ‘aho 30 ‘o Ma’asi 2016, ‘oku ‘oatu ai ‘a e fakama’ala’ala ko eni fekau’aki mo e tu’utu’uni na’e fakahokó.

Na’e fakahoko ‘a e tangi (appeal) ‘a Claude Tupou ki he Public Service Tribunal, ‘o fakatatau ki he Lao ki he Ngāue Fakapule’anga, fekau’aki mo e ola ‘o ‘ene tohi ngāue ki he lakanga ko e Pule Ngāue ki he Potungāue Ako mo e Ako Ngāue (CEO for Education and Training).  ‘I he lolotonga ko ení na’e hoko ‘a Claude Tupou, ko e Pule Ngāue Le’ole’o ki he Potungāue.  Na’e fakahoko ‘e he Public Service Tribunal ‘enau ngāue pea fakahoko ‘enau tu’utu’uni ke fokotu’u ‘a Claude Tupou ko e CEO ki he Ako mo e Ako Ngāue pea na’e fakamo’oni ki ai ‘a e ‘Eiki Palēmia pea mo e Minisitā ki he Ako mo e Ako Ngāue.

Na’e hoko atu leva ‘a e ngāue ki he fokotu’u ko eni ‘e he Komisoni ‘a e Kau Ngāue Fakapule’anga pe Public Service Commission.  Na’e mahino hili e ngaahi fetalanoa’aki mo Claude Tupou ‘oku ‘i ai e ngaahi kupu ‘i he aleapau ngāue ki hono fokotu’u ia ki he lakanga Pule Ngāue ki he Potungāue Ako mo e Ako Ngāue ‘oku ‘ikai ke ne fiemalie ki ai.  Na’e hokohoko atu e alea ki he me’a ni pea ‘oku te’eki ai ke a’usia ha tu’unga fakafiemalie.

‘I he tu’unga ‘o e ta’efiemālie ko ia, na’e fai ai e fakakaukau ‘a e ‘Eiki Palēmia pea mo e Komisoni pea fai ai e tu’utu’uni ‘oku fakapotopoto ange ke fetongi ‘a e Pule Ngāue Le’ole’o ki he Potungāue Ako mo e Ako Ngāue, ‘a ia ‘e foki hifo pē ‘a Claude Tupou ki hono lakanga tu’uma’u ko e Tokoni Talēkita pea ke ‘alu hake ‘a e Tokoni Talēkita ko Ponapate Taunisila ‘o hoko atu ‘a e Pule Ngāue Le’ole’o ki he Potungāue Ako mo e Ako Ngāue,  koe’uhí eni ke tu’u tau’atāina ‘a Claude ke hoko atu ‘ene alea mo e ngāue ki he’ene ta’efiemalie, kae ‘atā ‘a e lakanga Pule Ngāue ia ke hoko atu e ngāue ‘a e Potungāue ‘o tataki ‘e Ponapate.  Na’e ‘osi fai e fakataha mo kinautolu ‘oku fekau’aki mo e tu’utu’uni ko eni ke femahino’aki.

‘Oku kei hoko atu pe ‘a e ngāue ‘a Komisioni ki he Ngāue Fakapule’anga ki he fokotu’u ha taha ki he lakanga ko e Pule Ngāue ki he Ako mo e Ako Ngāue.

-NGATA’ANGA-

Tuku atu mei he:‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax:  (676) 23 888; NgaahiFaka’eke’eke- Email: pressoffice@pmo.gov.to  

Translate »