GOVERNMENT OF TONGA

MEDIA RELEASE

(‘Aho 15 ‘o Siulai, 2015)

“Me’a ‘Eiki Palemia he fakataha ‘a e Kau Taki mei he Tukuifonua Polinisia ‘i Tahiti”

‘Oku lolotonga me’a ‘i Tahiti ‘a e ‘Eiki Palēmia, Hon. Samuela ‘Akilisi Pohiva ‘i he fakataha ‘aho ‘e ua ‘a e Kulupu Kau Taki mei he tukuifonua Polinisia (PLG), ‘a ia ‘e fakahoko mei he ‘aho 15-16 Siulai 2015.
‘E alea’i he fakataha ni ‘a e ngaahi kaveinga felave’i mo e feliuliuaki ‘a e ‘ea mo kamata ha polokalama fengaue’aki ki hono vakai’i ’a e ngaahi pole ‘oku fehangahangai mo e tukuifonua Polinisia he Pasifiki he ngaahi kaveinga ko eni.
‘E aofangatuku ‘a e fakataha ni ‘aki ha’anau fakamo’oni ‘a e kau taki ‘i he Marae Taputapuatea‘i Bora Bora ‘i ha Aleapau Felotoi ke tukuatu ki he Konifelenisi ‘a e Pule’anga Fakatahataha ki he Konivesio ki he Feliuliuaki ‘a e ‘Ea (COP21/CMP11) ‘e fakahoko ‘i Novema ‘o e ta’u ni ki Palesi, Falanise. Ko e aleapau felotoi ko eni ke fakamahino ai ‘a e taumu’a tefito ‘a e PLG ki ha ngaahi polokalama pau ‘oku fakataumu’a ki he feliuliuaki ‘o e ‘ea mo ha toe ma’u’angaivi fo’ou.
Ko e fakataha ‘aki eni hono ua ‘a e PLG, ‘a ia ko e fuofua fakataha na’e fakahoko ki ‘Aokalani, Nu’usila ‘i Fepueli ‘o e ta’u ni, ‘a ia na’e sea ai ‘a e Palēmia ‘o Ha’amoa, Hon. Tuilaepa Saulele Mailelegaoi. Ko e Palēmia ‘o Niue, Hon. Toke Talagi na’e sea kimu’a. Na’e talanoa’i ‘i ‘Aokalani he fakataha ni ‘a e founga ki hono pule’i ‘o e toutai ‘i he tukuimotu Polinisia.
Na’e kamata ‘a e kulupu PLG ‘i he ta’u ‘e nima kuohili ‘e he Palēmia ‘o Ha’amoa, ‘o memipa ai ‘a e kau taki ‘e toko 8 mei he tukuimotu ‘o Polinisia. Ko ‘enau taumu’a ngaue ke alea’i ‘a e ngaahi ngāue ‘aonga ma’a e kakai Polinisia mei he talafakafonua, talatukufakaholo, mo e ‘atakai.
Na’e me’a atu ‘a e ‘Eiki Palēmia he ‘aho Tusite 14 ‘o Siulai ‘o muimuifolau ki ai ‘a Va’inga Tone, Sekelitali ‘o e Potungāue ki Muli mo e Fefakatau’aki mo Malia Hola mei he ‘Ofisi ‘o e Palēmia. ‘Oku ‘amanaki ke nau ‘i Tonga ni ‘i he faka’osinga ‘o e uike.

NGATA’ANGA

Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahi Faka’eke’eke- Email: pressoffice@pmo.gov.to

Translate »