21ST MAY 2011
- Tapu mo ‘Eiki Nopele Ma'afu, ‘Eiki Nopele Vaea mo Hou'eiki;
- Tapu moe Hou'eiki Minisita ‘oe Kalauni;
- Tapu moe Amipasitoa oe Lepapulika oe Kakai o Siaina, His Excellency Wang Donghua ;
- Tapu mo Mr. Liu Jiansheng Fakafofonga e Kautaha Yan Jian Group Co. Ltd mo e Kautaha CCECC o Siaina;
- Tapu mo Fotu mo Afu pea mo Ha'a Matapule pea mo Ha'a Tauhi Fonua;
- Tapu moe Eiki Palesiteni oe Siasi Tonga Tauataina, Rev. Semisi Fonua mo Ha'a Lotu;
- Tapu moe Tangata'i Fonua moe Fefine'i Fonua ‘o Vavau
- Pehe foki ki he sola moe vulangi oku ‘i hotau ha'oha'onga ‘i Mataika ‘ihe efiafi ni.
‘Oku lolotonga fakahoko mai ki Vava'u ni,
kamata mei ‘aneafi, ‘aho Falaite, pea
hoko atu kihe ‘aho Tusite uike kaha'u ‘ae polokalama ‘ae Hou'eiki Memipa ‘oe
Fakataha Kapineti ‘a ‘Ene ‘Afio, pea tokoni atu ki ai e kau taki ‘oe ngaahi
potungaue ‘a e pule'anga. Koe vakai e
ngaahi ngaue kuo lava ‘ihe ‘uluaki mahina ‘e ono ‘oe Pule'anga lolotonga, pea
mo palani ‘o e ngaahi ngaue ke fakahoko ‘ihe ngaahi ta'u ka hoko mai.
‘Ihe taimi tatau ‘oku ma'u e faingamalie ke fakahoko ai moe ngaahi ngaue mahu'inga kehe ‘i Vava'u ni. ‘Oku lava ai moe ngaahi ngaue kihe fonua moe savea; palani e ngaahi ngaue kihe ma'u'anga ivi ‘a Vava'u; vakai e ngaahi ngaue kihe ngoue moe toutai; lava mo ‘emau fakataha Kapineti ‘aneafi; pea ko ‘eni koe lava eni ke kamata e ngaue kihe hala ‘oku fai ai e fefononga'aki.
Hange koia na'e fakamatala mai ‘ehe ‘Eiki Tokoni Palemia & Minisita kihe Fefononga'aki ‘ihe ‘ene me'a fakafe'iloaki, koe polokalama hala pule'anga ‘eni ‘ihe tokoni ‘ae Pule'anga Siaina, ‘iha no ma'ama'a ‘oku nau tuku mai ke lava fakalelei'i ai e ngaahi hala pule'anga lahi. ‘Oku lolotonga lele atu e polokalama ko ‘eni ‘i Tongatapu. Kuo hoko mai eni ki Vava'u ni, pea ‘e kau mai pea mo Ha'apai ‘ihe kaha'u vave mai.
‘Oku ou fie faka'aonga'i e faingamalie ko ‘eni keu kole atu kihe kau Pule Fakavahe moe kau ‘Ofisa Kolo ke mou tokoni mai kihe si'i kau ngaue ‘oku nau unga mai mei muli mo Tongatapu ke fai e ngaue mahu'inga ko ‘eni ki hotau ngaahi hala. Kuo pau ke tau fetokoni'aki kae vave mo lava lelei e ngaue ko ‘eni. ‘O kapau e tu'u atu ha faka'ilonga "TAPU" pea tau kataki ‘o fononga hake ‘iha hala ‘e taha, kae ‘oua ‘e toe fakafekiki mo fakake mai kihe kau ngaue. Ko ia ‘oku mahu'inga ke mou tokoni mai kae vave mo lava lelei e ngaue ko ‘eni.
Koe langa hala pule'anga koe langa fonua. Koe tokoni ke faingamalie e fononga ‘a e fanau ako kihe ako, kau ngaue kihe ngaahi ngaue , pea pehe foki moe fononga ki ‘uta ke langa hake ‘a tokanga. Ko ia ai ‘ofa e tokoni e polokalama fakalelei ‘oe ngaahi hala pule'anga ke tokoni kihe langa hake ‘o e ngoue ‘i Vava'u ni. ‘Oku tau tui foki ‘e toe tokoni kihe fetuku e fua ‘oe fonua ki maketi ke fakatau atu ai ke ma'u ha'atau pa'anga ke fua ‘aki ‘a ‘etau ngaahi kavenga.
‘Oku tau fakamalo kihe Tu'i ‘oe Lnagi kihe tapuaki kuo tau lave monu ai. Fakamalo kihe ‘Amipasitoa Siaina, His Excellency Wang Donghua pea mo honau Pule'anga. Fakamalo atu kia Mr. Liu Jiansheng moe Kautaha Yan Jian Group Co. Ltd pea moe Kautaha CCECC. Fakamalo atu kihe Palesiteni oe Siasi Tonga Tauataina Rev. Semisi Fonua kihe lotu moe tuku tapuaki kuo fai.
‘Oku ou fiefia keu fakahoko atu ‘a hoku loto mafana mo fiefia ‘ihe ‘etau lava katoa mai ke tau faka'ilonga'i e kamata'anga ‘oe polokalama ko ‘eni ko hono langa mo fakalelei ‘oe ngaahi hala pule'anga.
Malo ‘aupito
Leveleva e malanga kae tau atu.
NGATA'ANGA
Mei he: 'Ofisi 'o e Palemia, Nuku'alofa, 2011.
