GOVERNMENT OF TONGA

MEDIA RELEASE

(‘Aho 27 ‘o ‘Aokosi, 2015)  

“Tō folofola ‘a e Tama Tu’í, Tupou VI ‘i hono huufi ‘o e Faka’ali’ali Ngoue, Toutai mo e Koloa 2015 ‘a e vahefonua Tongatapú ‘i he Falaite 21 ‘Aokosi 2015.”

 

‘Oku ou kole keu hufanga atu. ‘Oku ou tomu’a tuku ‘a e fakafeta’i ki he ‘Otua Mafimafi ‘i he ‘ene tauhi mai kitautolu he ‘aho ni.

Kuo lava ‘a e ‘a’ahi ki he Vahefonua ‘Euá, pea na’e fakamāfana ‘a e talitali, pea hā mei he lahi ‘o e ngaahi koloa na’e faka’ali’alí ‘a e teuteu mo e ngāue fakataha ’a e kainga ‘o e Funga Fonuá ke fakalaka ange ‘a e ola ‘o e ta’ú ni mei he ta’u kuohilí.

Ko e kakato ia ‘o e ‘a’ahi ‘o a’u ki Tokelau Mama’o pea fakafiefia mo e fe’iloaki mo e  kainga ‘o e Vahefonua takitaha mo e mamata ki he tūkunga kuo a’usia ‘i he ta’ú ni. Pea mahino ‘oku ngāue ‘a e kainga ‘o e Vahefonua takitaha ke fakalakalaka pē kimu’a ‘enau ma’u’anga mo’uí. ‘Oku ‘i ai ‘a e ‘amanaki ‘e ‘ikai ke tu’u ma’u ai kae hokohoko atu ‘a e langa fonuá.

Ko e fakafiefia ‘a e mamata atu ki he faka’ali’ali ‘o e ‘ahó ni, ka ‘oku fe’unga pē ke takimu’a ‘a Tongatapu ni, ko e fa’ifa’itaki’anga ‘i he uki ‘o e tō ‘o e fua kehekehe ‘o e ngoué pea pehē ki he toutaí mo e fakatupu e ngaahi koloa faka-tonga.

‘Oku kehe foki ‘a e natula ‘o e ngoue mo e toutai ‘i Tongatapu ni, ‘a ia ko e konga lahi ‘oku taumu’a ke uta ki muli mo e fakamaketi fakalotofonuá.

Ko ia ‘oku ‘i ai ‘a e tui ‘oku ma’u ‘inasi mei ai ‘a e ngaahi fāmili tokolahi pea pehē foki ki hotau kainga ‘i he ngaahi fonua muli ‘oku uta atu ki aí.

‘Oku toe lahi ange foki mo e fakatupu e ngaahi koloa kehekehe ‘oku ngaahi fakalotofonua pea ‘oku ‘i ai e poupou ki he fakalakalaka ko eni pea kei mahu’inga pē ke tauhi ‘e he Vahefonua takitaha ‘a e tūkunga fakaholo ‘o e koloa ‘oku nau ngaahi mo ‘iloa ai.

‘Oku kei mahu’inga ‘aupito mo fiema’u ‘a e ngaahi tokoni ‘a e Potungāue ki he ngoué mo e toutaí koe’uhí ‘e fiema’u ke toe leleiange ‘a e tu’unga e ‘ilo mo e ngaahi founga ‘o e ngāue ‘i he taumu’a ke lava ke a’usia ‘e he kau ngoué mo e toutaí ‘i he Vahefonua takitaha ‘a e tu’unga ‘oku ma’olunga ange ki he ma’u’anga mo’uí pea ke lava ke matu’uaki ‘a e ngaahi pole ‘o natulá.

 

‘Oku ‘i ai ‘a e fakamalō ki he Minisitā ‘o e Ngoué mo e Toutaí mo ‘ene kau ngāue mo e ngaahi kupu ‘o e Pule’angá pea pehē ki he ngaahi kautaha taautaha, kau ngoué, kau toutaí, mo e kainga kotoa koe’uhí ko e fakahoko ‘o e faka’ali’ali ‘o e ‘ahó ni pea pehē ki he faka’ali’ali ngoue kotoa ‘o e ta’ú ni.

‘Oku ou talamonū atu ke mou ma’u ha ‘aho katoanga fiefia.

 

Malō

 

NGATA’ANGA

 

Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644     Fax:  (676) 23 888; Ngaahi Faka’eke’eke- Email: pressoffice@pmo.gov.to 

Translate »